"УРУУМ КУДАЗЫНГА ЙӨРЭЭЛ"
© Александр Даржай
Сарыг аастыг куш төлү өйү кээрге,
Чалгын хергеш, ак-көк дээрже ужугуптар.
Өскен-төрээн, чылыг уяң бөгүн каггаш,
Өске өгже чоруп тур сен, мээң кызым.
Өөренген өөңге ышкаш, хостуг шөлээн,
Өйлеп чаңнаар туразында чүве турбас -
Өске чаңчыл, өске ужур, өске аажы,
Өске үннер, өске өңнер сени уткуур.
Кижээ барган кыстың сагыыр чүвези хөй,
Кичээнип чор, угаап бода күжүр кызым!
Бээ-кунчууң сагылгазын эдерип чор,
Бети-биле хары-муңчок салып эртпе.
Даңгаар эртен кымны мурнай тура халааш,
Далган-хуужуур, сарыг шайың хайындыр.
Дүъшке чедир чылыг дөжек ээзи болбайн,
Дүнеге киир олут орбайн ижен, кызым!
Багай чаңың көстү берзе чүден чуттуг -
Баштай бистиң адывысты адааны ол!
Сарыг аастыг куш төлү өйү кээрге,
Чалгын хергеш, ак-көк дээрже ужугуптар.
Өскен-төрээн чылыг уяң бөгүн каггаш,
Өске өгже чоруп тур сен, чаңгыс кызым.
Чаа тыпкан төрелдериң эки чаңын
Чандыр угаап тоомча албайн бардың, кызым.
Улугларны дөрже чалап, дыжын камна,
Уругларның бажын суйбап, чассыдып чор.
Бодал чокка сөстер эдип, човаг кылбайн,
Бодуң таптыг арты-иштиң хынанып чор.
Авайыңга аакталып болгай-даа сен,
Аңаа кызым, могаттынып черле болбас.
Болур-болбас чүүлдер ужун херт-бурт кыннып,
Божуу дүрген үвүң алгаш, кажып келбе.
Аваң шаңнаан сеткил каазын хирлендирбе,
Атка багай, ону бода, эргим кызым.
Сарыг аастыг куш төлү шаа барып,
Чалгын хергеш, кудай-дээрже кылыйтыптар.
Өскен-төрээн, чылыг уяң бөгүн каггаш,
Өске өгже чоруп тур сен, мээң кызым.
Өгнүң чылыы, аштыг-чемнии - херээженде,
Өлчей-кежии ооң хензиг холдарында!
Чаа өөңнүң оду отчуг, чылыг-чырыы -
Чаңгыс сенде, ону бода, ынак кызым.
Кижиниң бир улуг байы - оду болур.
Кирген чонуң аңаа чыннып, сергеп алзын.
Оолдуң-кыстың ойнун ойнаар, өткүт-хөглүг,
Окпан-чикпен ажы-төлден шаңна, кызым.
Кижиниң бир дээди байы - ажы-төл чоор,
Ада-өгбе төөгүзүн уктап салгаар,
Амыдырал шимеп каастаар чечектер-дир.
"Дүне-хүндүс кижи кулаа амыратпас,
Дүвүренчиг чүү адам чүвел бо!" деп,
Түвексинип, келген улус чемелеве.
Кижиниң бир улуг байы - кырган-чалыы
Кирген-үнген чону боор чоор, утпа кызым.
Сарыг аастыг куш төлү шаа барып,
Чалгын хергеш, кудай-дээрже кылыйтыптар.
Өскен-төрээн, чылыг уяң бөгүн каггаш,
Өске өгже чоруп тур сен, мээң кызым.
Күдээм оолдуң иези сээ - ава болзун,
Күдээм оолдуң адазы сээ - ача болзун.
Кады төрээн угбалары, дуңмалары
Кажан шагда кагжып болбас төрел болзун.
Даайлары, шанылары, акылары
Даянгыыжың, чөленгиижиң болзун, кызым.
Чуузага олурупкаш чындыңнадыр
Чурталгада каалама оруктар чок.
Аас-кежииң, ажыг-шүжүүң кады деңге
Аралажып, үлежип чор, ынак кызым.
Өске өгже келин болуп чоруй баргаш,
Өскен өөңнү, чылыг сеткип, сактып чору.
Аваң-ачаң, төрел-бөлүүң адын сыкпайн,
Амыдырап-чуртап чору, чассыг кызым.
Ууттунмас алдын-мөңгүн аазавас мен.
Угаадыымны өнчү кылдыр өргүп тур мен.
Сарыг аастыг куш төлү шаа барып,
Чалгын хергеш, кудай-дээрже кылыйтыптар.
Өскен-төрээн, чылыг уяң бөгүн каггаш,
Өске өгже чоруп тур сен, мээң кызым.
#шулук #йорээл